Pingaartillugit tunngavigisaq:
Atuarfik Prinsesse Margrethemi pingaartillugit tunngavigisat Atuarfik pillugu Inatsisartut peqqussutaat nr. 8, 21. maj 2002-meersumut naapertuuppoq. Atuarfiup allanngortiterneqarnera, ”Atuarfitsialaap anguniagarivaa, avatangiisit peqqinnartut toqqissisimanartullu neqeroorutigissavai, taamaasiornermigullu atuartup namminersortumik eqqarsarsinnaanera, akuersaaginnarani nammineq isummersinnaassuseqarnerminik piginnaassusai, isummaminik, nammineq isiginnittaatsiminik misigissutsiminillu oqaatiginnissinnaassuseqarnera kiisalu anguniakkaminik angusiniarsinnaanermigut , allanngortitseriarsinnaassutsimigut, tunniussimassutsimigut pilersitseriarsinnaassutsimigullu piginnaasai siuarsassallugit.
Atuarfiup atuartitsinermini atuartoq piginnaasassanik, suleriaatsinik atuagarsornikkullu piginnaasassanik iluaqutaasussanik pissarsinissamut periarfississavaa, taakkununnga ilaatinneqassapput atuartup piginnaasaminik ineriartortitsisinnaanissaa, ilinniagaqarnissamut inuussutissarsiutitaarnissamullu piareersarneq kiisalu tamatigoortumik saqqummiusseriarsinnaaneq oqaatsinillu piginnaasat tamatigoortut.
Atuarfik, taakkununnga ilanngullugit sunngiffimmi sammisassaqartitsinerit klubbillu,ulluinnarni ingerlatsinini sulininilu imatut sinaakkusersussavaa, atuartut imminut naleqartinnerminik, imminut tatiginerminik, suleqateqarsinnaasuseqarnerminik, akisussaassuseqarnerminik inunnullu allanut ataqqinninnerminik ineriartortitsisinnaalersillugu.
Atuarfiup suliamini tamani atuartup inuiaqatigiinni kinaassutsiminik, kulturiminik pingaartitaminillu paasinninnerminik ilisimasaminillu ineriartortitsinissaa tunngavilissavaa, inuiaat allat kulturiinik ilisimasaqarnera paasinnissinnaaneralu ineriartortissavaa, oqartussaaqataanermik eqqarsartaatsimut iseriartuaartinneqarnissaa isumagissavaa kiisalu oqartussaaqataanerminut, pisinnaatitaaffeqarnerminut, pisssaaffeqarnerminut inuiaqatigiillu ineriartornerannut pinngortitamullu naleqqussarniarnerminut atuartup nammineq akisussaaqataanerminik paasinnissinnaanera ineriartortissallugu.
Atuartitsissutini tamani atuartitsinerup aaqqissorneqarnera, atuartitseriaatsit suleriaatsillu atorumasat ilanngullugit, periutsit, atuartitsinermilu atortut atortussanillu atugassanik toqqaasarneq atuarfiup siunertaanut, alloriarfiit ataasiakkaat siunertaanut, atuartitsissutit ataasiakkaat atuartitsissutillu qanitariissut siunertaanut aamma ilikkagassatut pilersaarutinut naapertuuttuussapput. Atuartitsineq allanngorartuussaaq, atuartut ataasiakkaat pisariaqartitaannut piginnaariigaannullu naapertuuttuussalluni. Atuartitsissutini tamani ilinniartitsisoq atuartorlu suleqatigiillutik ingerlaavartumik anguniagassaliortassapput. Atuartup sulinissaa anguniagassaliarisimasat tunngavigalugit aaqqissuunneqartassaaq. Suleriaatsinik, periuutsinik aamma sammisassanik toqqaanerit aalajangersaanerillu ilinniartitsisut atuatullu suleqatigiinnerisigut ingerlanneqartassapput.
Atuartut iluatsitsiviusumik atuarnissaannut angerlarsimaffimmi pitsaasumik suliassaqartitsineq pingaaruteqarpoq. Taamatut suleqatigiinneq atorlugu atuarfiup angerlarsimaffiullu suleqatigiinnerat paariinnarneqarsinnaavoq atuarnermullu akisussaassueqarnermut sunniuteqarluni.
Atuarfeqarfiup tamakkiisup qulakkiissavaa, atuartut tamarmiusut tunngaviusumik ilikkagaqarsimanissaat, siunissami ilinniarnissamut, sulinissamut sunngiffimmilu peqataanissamut periarfissiisumik.
Atuarfik tamanut tunuliaqutarisaq, sapinngisat piginnaasallu apeqqutaatinnagit ammasuussaaq.
Atuarfik ineriartortuaannartuussaaq. Tassa imaappoq, avatangiisinik ilikkartitsiviusinnaasunik pilersitsisoqassaaq, tassani atuartut suleqataasullu ineriartorfigisinnaasaannik. Tamanna ilaatigut isumaqarpoq, atuarfik suliffeqarfini tamaat ilanngullugu peqataassasoq, tassunga ilanngullugit ilisimasanut nutaanut periutsinullu suleriaatsinullu nutaanut pingaarnertut tunngavimminut.
Ineriartorfiusumik atuartitsinissamut sunngiffimmilu sammisassanut neqerooruteqarnissamut suleqataasunullu akulerusimasunut tunngavissaq pitsaasuussaaq. Sulisoqarnermut politikki ullutsinnut tulluartoq atorlugu inuttut sulinikkullu ineriartortitsineq ingerlanneqassaaq, taakkununnga ilanngullugit ilinniartitseqqiinerit ilinniaqqinnerillu.
L.