Meeqqanut inuusuttunullu politikki:

 

Meeqqanut inuusuttunullu sullissiviit tassapput, ullukkut meeraaqqanik paaqqinniffiit, ullukkuunerani paaqqinnittarfiit, meeqqat atuarfii, inuusuttunut atuarfiit, atuakkanik atorniartarfiit, sunngiffimmi susassaqartitsiniarnermi ingerlatsivik, peqqinnissamut suliniutit allallu, aammali meeqqanik siunnersuisarfiit, uanilu meeqqanut, inuusuttunut, ilaqutariinnullu immikkut pisariaqartitsisunut siunnersuisarfiit.

 

↑     Anguniagaq pingaarneq

Upernavik kommunemi, meeqqanut, inuusuttunullu suliniutit assigiinngitsut, ataatsimut isigineqarput. Pingaartinneqarlutik innuttaasunik, atuisunullu aammalu suliffeqarfiit akimorlugit suliniutit, kulturikkut sunngiffimmi sukisaarsarnikkut, atuarfeqarfimmit aammalu inunnik isumaginninnermit, peqqinnissaqarfimmiillu suliniutit, ataqatigiiusut tapersersoqatigiittut. Ilaqutariinnut meeqqamulluunniit immikkut pisariaqartitsisumut suliniutit, naliginnaasumik ingerlatsisarnermi periarfissat naapertorlugit ingerlanniarneqartassapput.

Upernavik kommunep, meeqqanut inuusuttunullu tunngaviusumik pingaartitaminut, pingaartitat amelanngitsut kisiannili pisariaqartunik tunngaveqartut:

  • Meeqqat susassanut peqataarusuttut nassaarniassaqqissullu

  • Meeqqamut tatiginninnerneq, taassumalu immikkut illuinnartuuneranik aammalu pisariaqar-titaanik

  • Unammillernartutigut akisussaassusilerneqarnikkullu ineriartorneq

  • Toqqissisimaneq

  • Meeqqanik immikkut pisariaqartitsisunik, aaliagersimasumik anguniangalimmik, suliffeqarfiit akimorlugit sullissineq

  • Angajoqqaat meeqqamik ineriartornerannut akisussaasuupput – uagut tapersersuisuuvugut

  • Kalaallit kulturikkut periusitoqaat, allallu pingaartitaannik ataqqinninneq

  • Pinngortitamik avatagiisinillu ataqqinninneq

 

Upernavik kommune ukiuni aggersuni, meeqqanut inuusuttunullu neqeroorutigisartakkami imarisaanik pitsaassusaanillu ineriartortitsiniarpoq. Meeqqanut inuusuttunullu suliniutini, anguniakkat ineriartortisinerillu pissapput, sullitassat, angajoqqaat, meeqqat, inuusuttut, sulisullu  sulinermut peqataatillugit.

Immikkut anguniagaassaaq, meeqqat inuusuttullu inuuniarnermi, atuarnermilu piginnaaffiisa, ilisimasaasalu pitsanngorsarneqarnissaat. Upernavik Kommune-mi meeqqat inuusuttullu peroriartornerminni inuttut peqqinnissakkut, misigissutsisigut ilikkagaqarniarnermikkullu ineriartornissaminnut pitsaanermik periarfissaqartinneqassapput, saniatigut ilinniagaqarnissaminnut kajumilersillugillu periarfissinneqarniassallutik. Meqqat inuusuttullu Upernavimmi avataanilu silarsuarmi unammillernartunut periarfissanullu akuunissaminnut piumassuseqalertariaqarput, piginnaaneqartariaqalerlutillu.
 

↑     Meeqqat inuusuttullu ineriartornerat qitiutillugu

Unammillernartut misigisallu, imminut tatiginermik namminerlu aaliagiisinnaanermik pisinnaatitaaneq

Meeqqat inuusuttullu malugisariaqarpaat atorfissaqartinneqarlutik aammalu iluatigineqarlutik. Meeqqat inuusuttullu pitsaasunik periarfissinniarpagut, inoqatiminnik imminullu tatigalutik unammillersinnaasunngorlugit. Misigisat pitsaasut, nuannaarneq aammalu ajugaanermik misigisimasaaqqat, meeqqat inuusutullu imminnut tatiginerat annerulersissavaa

Meeqqat inuusutullu aaliagiisarnernut peqataatinneqassapput, taamalu misigisaqarfigissallugu aaliagiinerit aammalu aaliageeqataanissamut periarfissaqarnerit, periarfissap siumut aaliageriikkap iluani. Akisussaassutsimik tigusisinnaaneq akisussaassuseqarsinnaanerlu ilinniassavaat – inuunerminnut aammalu inoqatiminnut. Upernavik kommunemi meeqqat, inuusuttut, inersimasullu inuupput, iliuuseqarnermik iliuuseqannginnemillu kinguneqarsinnaanerannik naapertuillutik.

Meeqqat inuusuttullu unammillernartunik ujarlertassapput aammalu eqqaminni pisunik malugisaqarluarniartassallutik. Silarsuarmullu assigiinngitsorpassualimmut ammasuussapput misigisaqaqqinnissaminnullu ersigisaqassanatik. Ilaatigullu periutsit nutaanngorlugit inuiaqatigiinni nutaaliaasuni siumukarnissamut periarfissaasinnaasarput.

Imaapporlu:

  • Suliffeqarfiit, atuarfiit allallut, meeqqat aaliageeqataasarnissaannut namminnerlu aaliagiisinnaalernissaannut, periarfissanik assigiinngitsunillu periusissanik suliniuteqassasut

  • Sulisullu alaatsinaassagaat, meeqqat inuusuttullu piginnaasaasa ilisimasaasalu ineriartortuaan-nartinneqarnissaat

  • Meeqqat, inuusuttut sulisullu nutaaliorlutik misilittaallutillu sulisinnaassasut – qanilaarnerli puigornagu

  • Meeqqat inuusutullu unammillernissaminnik misigisaqassapput, ineriartornerminnut nukittorsaatissaminnik

  • Sullissisut angajoqqaat suleqatingalugit peqataassapput, meeqqat inuunermut isumalluarnissaannut isiginnilersitsinissamik, inoqatinut tatiginninnermik tunngavilimmik.

  • Meeqqat inuusuttullu periarfissinneqassapput inuttut immini ineriartornissaminnik, aammali pingaartinneqassalluni inoqatimik akornanni inooqataasinnaanissaat

  • Meeqqat inuusuttullu ajornartorsiutillit, naliginnaasumik ingerlanermut, sapinngisaat tamaat naapertorlugu, akulerussimatinniarneqartassapput

 

↑     Meeqqat inuusuttullu inuunerat avissaartorfeqarani ataatsimoortoq

Upernavik kommunep qanimut suleqatigai, sulisuni, angajoqqaat, atuarfiit, suliffeqarfiit aammalu meeqqat inuusuttullu sunngiffimmi susassaqartitsivik taavamalu meeqqanut inuusuttunullu inuuneq avissaartoorfeqanngitsoq ataatsimoortoq misigisarlungu.

Imaapporlu:

  • Paarineqarnerup, atuartitsineqarnerup, piorsarsimassutsip, peqqinnissaqarfiup pinaveersaartitsinerullu ataqatigiissumik suleqatigiinnerat ineriartortinneqassaaq, taamaalilluni kommunimi suliffeqarfiit assigiinngitsut akornanni, meeqqaanut inuusuttunullu susassaqartitsinerit periutsillu, akunnattoornanngitsumik suleqatigiinnermi ingerlanneqassallutik

  • Pinaveersaartitsinermik iliuuseqarnerup aallaavigissavai, isumalluutit periarfissarsiorneqarsinnaasut tamaasa  

                                           

↑     Pinaveersaartitsineq – siusissukkut iliuuseqarneq

Upernavik kommune-mi meeqqanut inuusuttunullu suliniuteqarneq ineriartortinneqassaaq, siusinnesukkut pinaveersaartitsinerusumillu kinguneqartussamik. Pinaveersaartitsinermi assigiinngitsut aqqutigineqartarput, piorsarsimassutsikkut susassaqartitsinerniit sunngiffimmi susassaqartitsinernut. Pinaveersaartitsineruvortaaq, suleqataasut kommunellu iluani suliffeqarfinni meeqqat pillugit naliginnaasumik suliniutaat. Ilanngulluguttaaq ilaqutariit inuuniarnermut atatillugu atugassakinnerusut peqqinnerup tungaatigut assigiinngissutaannik annikillisaanissaq.

Immikkut ittumik meeqqat inuusuttullu akornanni pinaveersaartitsineq, suliffeqarfiit akimorlugit ingerlanneqartassaaq aammalu meeqqanut, ilaqutariinni immikkut pisariaqartitsisuniitunut tunaartaralugit suliniuteqartoqartassalluni. Suliniuteqarnerit ilaqutariit iluanni, meeraaqqanik   paaqqinnittarfinni, suliffeqarfinni atuarfinnilu pisassaaq, uanilu atuarfeqarfiup, inunnik isumaginnittoqarfiup peqqinnissaqarfiup politiillu  akornanni (SSSP) suleqatigiinnerni. Meeqqat inuusuttullu akisussaaffeqarnikkut ineriartornerat tapersersorneqassaaq.

Imaapporlu:

  • Meeqqat inuusutullu akornanni pinaveersaartitsineq kommunep pinaveersaartitsineranut politikkip ilaaniitutut tamatumungalu atasutut isigineqassaaq aammalu pinaveersaartitsineq pillugu ataatsimiititaliamik pilersitsisoqarsinnaanera eqaarsaatigineqarsinnaalluni

  • Piorsarsimassutsip aammalu sunngiffimmi susassaqartitnerup ataani suliniutit, kommune-p pinaveersaartitsinermik sulinera aallavingalugu, eqqarsaatigineqarlutik, tulleriiaarneqarlutillu nalilersorneqartassapput

  • Meeqqanik inuusuttunillu sulissisut pisortaasalu akornanni isumakulunnermiit suliamik piviusunngortitsisarnissaq ilinniartariaqarpaat – pinaveersaartariaqarpagut, malugisatsigut, annertoqqusiisarnikkut aammalu siunnersuisarnikkut kingusinaarluta suliniuteqalertarnivut

  • Inuusuttut imigassamik pujortarnikkullu atortagaat appartinneqassapput

  • Meeqqat inuusuttullu peqqinnartunik nerisaqarnermik ilisimasaat, misigisimasaat aammalu timigissartarnermik, qasujaallisartarnermillu misilitagaat patajaallisarneqassapput

                                          

↑     Angajoqqaajuneq – akisussaaffik pimoorussinerlu

Meeqqat inuusuttullu ineriartornerat angajoqqaat akisussaaffigaat. Upernavik kommunep neqeroorutissai suliarineqassartassapput, angajoqqaanut tapersersuinissaq siunertarlugu, angajoqqaajusut inersimasutut periuseqarlutik, ineriartorfissamik toqqissisimaffiusumik pilersitsinissaat aammalu meeqqaminnut, imminnut tatiginermik suleqateqarsinnaanermillu tunniussinissaat siunertaralugu.

Qulaani pingaarnertut anguniakkami taaneqartutut pisariaqartippagut, angajoqqaat akisussaasut tunniusimasullu, meeqqap ineriartornermini atugarissaarneranut ineriartorneranullu. Taamaammat Upernavik kommunep, meeqqat inuusutullu akornanni sulinermi tunngavigai angajoqqaat, politikkerit aammalu sulianillu ilinniagaqarsimasut, aammalu pisariaqartitsineq naapertorlugu angajoqqaat nukittorsarniarlugit sullinneqartarlutik.

Imaapporlu:

  • Sulisut, pisortat aammalu politikkerillu angajoqqaanut paasititsisassapput, angajoqqaallu paasititsissutigineqarsimasunut iliuuseqarfigisassavaat

  • Ingerlaavartumik oqaloqatigiissinnaaneq pingaartinneqarpoq aammalu angajoqqaat piviusumik sunniuteqavittarnissaannik tunineqassallutik

  • Angajoqqaat, atuisut siulersuisuinut, ataatsimooqatigiinnut assigisaannullu peqataasalernissaannut soqutiginnittunngorsarneqassapput

  • Angajoqqaat angajoqqaanut susassaqartitsiffinnut peqataasassasut aammalu kinguneqarsinnaasumik oqaloqatigiissinnaanermut

  • Taamaasilluni meeqqap inuusuttullu angajoqqaamik ulluinnarni kommunip suliffeqarfiutaani inuunermik soqutiginninnerat malugisarniassavaat

 

 

 

L.